అమెరికా కాంగ్రెస్ ఎన్నికల్లో ముగ్గురు భారత సంతతి అమెరికన్ల విజయం

వాస్తవం ప్రతినిధి: అమెరికా ప్రతినిధుల సభకు జరుగుతున్న ఎన్నికలలో భారత సంతతికి చెందిన అమెరికన్లు ముగ్గురు తొలి విజయం సాధించారు. ఎన్నికల ప్రక్రియలో భాగంగా ఆగస్టు 31న ఆరిజోనా, ఫ్లోరిడా రాష్ట్రాల్లో ప్రైమరీ ఎన్నికలు జరిగాయి. అయితే ఈ ఎన్నికల్లో హిరాల్‌ తిపిర్నేని, అనితా మాలిక్, సంజయ్‌ పటేల్‌లు ఏకగ్రీవంగా గెలిచారు. వీరిలో తిపిర్నేని, మాలిక్‌లు ప్రతిపక్ష డెమోక్రాటిక్‌ పార్టీ తరఫున ఆరిజోనా నుంచి పటేల్‌ ఫ్లోరిడా నుంచి  పోటీ చేయగా విజయం సాదించారు. ఆరిజోనా రాష్ట్రంలోని 8వ కాంగ్రెస్‌ స్థానం నుంచి తిపిర్నేని ఏకగ్రీవంగా ఎన్నిక కాగా, మాలిక్‌ 6వ కాంగ్రెస్‌ స్థానంలో ముగ్గురితో పోటీ పడి మరీ నెగ్గారు. పటేల్‌ ఫ్లోరిడాలోని 8వ కాంగ్రెస్‌ స్థానంలో ఏకగ్రీవంగా విజయం సాధించారు. నవంబర్‌లో జరిగే సాధారణ ఎన్నికల్లో మాలిక్‌ రిపబ్లికన్‌ అభ్యర్థి డేవిడ్‌ సావికెర్ట్‌తో తలపడాల్సి ఉంటుంది. ఈ ఏడాది మొదట్లో జరిగిన ప్రత్యేక ఎన్నికల్లో తిపిర్నేని రిపబ్లికన్‌ అభ్యర్థి డెబీ లెస్కో చేతిలో ఓడిపోయిన సంగతి తెలిసిందే. అమెరికా ప్రతినిధుల సభలో ప్రస్తుతం నలుగురు భారతీయ అమెరికన్లు ఉన్నారు. అమెరికా కాంగ్రెస్‌ చరిత్రలో ఇంత మంది భారతీయులు ఎంపీలుగా ఉండటం ఇదే మొదటి సారి. వీరిలో అమిబెరా(కాలిఫోర్నియా) మూడో సారి కాంగ్రెస్‌కు ఎన్నిక కాగా, రాజా కృష్ణమూర్తి(ఇల్లినాయిస్‌), ప్రమీల జయపాల్‌(వాషింగ్టన్‌), రో ఖన్నా(కాలిఫోర్నియా)లు మొదటి సారి సభకు ఎంపికయ్యారు. ఈ నలుగురూ డెమోక్రాటిక్‌ పార్టీకి చెందిన వారే. ఈ నలుగురు కూడా ప్రైమరీ ఎన్నికల్లో గెలిచి నవంబర్‌ ఎన్నికలకు సిద్ధపడుతున్నారు. వీరు కాకుండా మరో నలుగురు భారతీయ అమెరికన్లు కూడా ఇంతకు ముందే ప్రైమరీ ఎన్నికల్లో గెలిచారు. వారిలో జితేందర్‌ దిగంకర్, హారీ ఆరోరా, అఫ్తాబ్‌ పురేవాల్‌లు రిపబ్లికన్‌ పార్టీ అభ్యర్థులుగా బరిలో ఉన్నారు. నాలుగో వ్యక్తి అమెరికా మాజీ దౌత్యవేత్త ప్రిస్టన్‌ కులకర్ణి.ఈ ఏడాది ప్రారంభం నుంచి జరుగుతున్న ప్రైమరీ ఎన్నికల్లో దాదాపు 20 మంది భారతీయ అమెరికన్లు పోటీ చేస్తున్నారు.