ప్రేమోన్మాదానికి బలైన మరో మైనర్ బాలిక

వాస్తవం ప్రతినిధి: ప్రేమోన్మాదానికి మరో విద్యార్థిని బలైంది.ఉస్మానియా విశ్వవిద్యాలయం వద్ద ఇటీవల ఓ ప్రేమోన్మాది దాడిలో ఇంటర్ విద్యార్థిని బలైన ఘటన మరచిపోకముందే అలాంటిదే మరో ఘటన చోటుచేసుకోవడం విషాదాన్ని మిగిల్చింది.
ప్రేమ పేరుతో వేధిస్తూ.. తనకు దక్కదనే అక్కసుతో ఓ మైనర్ బాలికను గొంతు కోసి చంపేశాడు ప్రేమోన్మాది. హైదరాబాద్ శివారల్లోని ఐడీఏ బొల్లారంలో ఈ విషాదం చోటుచేసుకుంది. పోలీసులు, స్థానికులు తెలిపిన వివరాల ప్రకారం.. ఐడీఏ బొల్లారంలోని వినాయక్‌ నగర్‌లో నివసించే గోరు నిఖిత (15) స్థానిక శ్రీ సాయి విద్యానికేతన్‌ పాఠశాలలో పదో తరగతి చదువుతోంది. అదే కాలనీలో నివాసం ఉండే అరవింద్‌ అలియాస్‌ సోను అనే యువకుడు ఆమెను ప్రేమ పేరుతో వేధిస్తున్నాడు. బీటెక్ చదువుతున్న అరవింద్ రెండేళ్లుగా నిఖిత వెంట పడుతున్నట్లు స్థానికులు తెలిపారు. అయితే నిఖిత అతడి ప్రేమను నిరాకరిస్తూ వస్తోంది. దీంతో అరవింద్ ఆమెపై కక్ష పెంచుకున్నాడు. నిఖిత తనకు దక్కదని , తనకు దక్కని ఆమెను కడతేర్చాలని నిర్ణయించుకున్నాడు. ఈ క్రమంలో నిన్న సాయంత్రం నిఖితపై దాడి చేశాడు. వెనుక నుంచి వచ్చి కత్తితో ఆమె గొంతు కోసి పరారయ్యాడు.

రక్తపు మడుగులో పడిఉన్న నిఖితను చూసి కుటుంబసభ్యులు   వెంటనే కూకట్‌పల్లిలోని రెమెడీ ఆస్పత్రికి తరలించారు. అక్కడ చికిత్స పొందుతూ నిఖిత మృతి చెందింది. దాడి చేసిన అనంతరం పారిపోతున్న అరవింద్‌ను స్థానికులు పట్టుకున్నారు. అనంతరం అతణ్ని పోలీసులకు అప్పగించారు. నిఖిత తల్లిదండ్రుల ఫిర్యాదు మేరకు కేసు నమోదు చేసి దర్యాప్తు చేస్తున్నట్లు సీఐ సతీశ్‌ రెడ్డి తెలిపారు.