హిట్ లిస్ట్ లో ప్రముఖ నటుడు కూడా ఉన్నాడు!

వాస్తవం ప్రతినిధి: ప్రముఖ జర్నలిస్ట్ గౌరీ లంకేష్ దారుణ హత్యకు గురైన సంగతి తెలిసిందే. హిందూత్వ భావాలకు వ్యతిరేకంగా మాట్లాడుతున్నారన్న ఆరోపణలతో లంకేశ్‌ను గత ఏడాది సెప్టెంబర్‌ 5న తన ఇంటి సమీపంలోనే కిరాతకంగా హత్య చేసిన విషయం తెలిసిందే. రాడికల్‌ హిందూత్వ గ్రూప్‌ సభ్యులు ఆమెను హత్య చేసినట్లు పోలీసుల విచారణ లో తేలింది. అయితే ఈ కేసుకు సంబంధించి అమోల్ కాలే ను అదుపులోకి తీసుకున్నారు పోలీసులు. అయితే అతడి నుంచి స్వాధీనం చేసుకున్న డైరీ లో పలు ఆసక్తికరమైన అంశాలు వెలుగు చూశాయి. ఆ డైరీని పరిశీలించిన సిట్‌ అధికారులు హిట్‌ లిస్ట్‌లోని పేర్లను చూసి షాక్‌ తిన్నారు. హిందూత్వానికి వ్యతిరేకంగా మాట్లాడుతున్న 37 మంది హిట్‌ లిస్ట్‌లో ఉన్నట్లు సిట్ అధికారులు తెలిపారు. అయితే ఆ లిస్ట్‌లో మొదటి పేరు కన్నడ ప్రముఖ నటుడు గిరీష్‌ కర్నాడ్‌ పేరు ఉన్నట్లు సిట్‌ అధికారులు వెల్లడించారు. రెండో వ్యక్తిగా జర్నలిస్ట్‌ గౌరి లంకేశ్‌ ఉన్నట్లు గుర్తించారు. 2016 నుంచి హిట్‌ లిస్ట్‌లో ఉన్న వారిపై హత్య ప్రయత్నాలు చేస్తున్నట్లు డైరీలో వారు పేర్కొన్నారు. ఈ ఆపరేషన్‌ కోసం 50 మంది కరుడుగట్టిన హిందుత్వవాద షూటర్లను కూడా రిక్రూట్‌మెంట్‌ చేసుకున్నారు. ఈ విషయాలను డైరీలో కోడ్‌ భాషలో రాసుకున్నటు సిట్‌ అధికారులు వెల్లడించారు. ఈ నేపధ్యంలో హిట్‌ లిస్ట్‌లో నంబర్‌ వన్‌గా ఉన్న గిరీష్‌ కర్నాడ్‌కు కర్ణాటక పోలీసులు గట్టి భద్రత కల్పించారు.